#香香食好西 #nearD好西 #食在尖沙咀 #牛魔 尖沙咀牛魔都唔係第一次寫，除燒肉外，午市都有供應定食，事隔半年原來餐牌早已轉新。 除咗招牌嘅鐵板牛肉、慢煮牛肋骨依然保留，其餘選擇都轉變不少，多咗港人熱愛嘅香口炸雞扒同堆積如山嘅爆丼等😋 以定食而言牛魔定價唔算高昂，平均一百蚊落樓。 前菜為常見嘅中華沙律； 沙律菜中規中矩，算唔上新鮮多汁，但配上日式胡麻醬寧捨開胃。 味噌湯口味比日本當地嘅淡身，相信材料加入牛骨，湯水清而帶牛香。 🐔博多唐揚雞扒 $85 雞扒炸粉薄身，炸得鬆脆唔油，以無做開炸物嘅燒肉店嚟講值得一讚； 但夾層雞肉偏薄，感覺炸粉佔咗大半，伴碟嘅蛋黃醬幾特別，鹹鹹香香，呢個配搭都係第一次食。 🧆宮崎和牛咖喱漢堡 $125 兩塊漢堡圓潤飽滿，係咪和牛就唔知，但口感鬆軟，除甘荀碎粒外其餘都係肉，唔係溝粉👍🏻 可能係加上芝士同本身咖喱調味偏重嘅緣故，整體略嫌偏鹹咗啲，送飯食就啱啱好。