食在元朗

Feeds

#香香食好西 #是日早餐 #飲茶懷舊酒樓早已買少見少，見facebook消息話天水圍敘福樓不獲續租、做到月中，趁尾牙去支持吓。午市正價時段仍一如既往聚集唔少街坊輪候。 🐷豬腳薑大大碗好足料。薑夠大塊入味，吸滿酸甜適中嘅薑醋汁，愈食愈暖胃；豬腳大大件，皮肉晶凝彈滑，一咬就食到滿滿膠質，好滿足。 🥠蜂巢芋角少數我覺得炸得出色嘅！外層嘅蜂巢鬆脆鬆化，絲毫不油，無油抑味，抵讚👍🏻 芋頭同樣鬆軟，包住豬肉、菇粒等，鹹香除去炸物嘅膩，入口更香口；豬肉係粒狀而唔係肉糜，仲食到落咗菜莆，兩樣加埋好有咬口🤩 🥟燒賣比以往更大粒，可能收爐大酬賓😂餡料幾飽滿，正常水準。 #食在元朗 #敘福樓金閣

#nearD好西 #香香食好西 #食在元朗 #urbancafecommune 自從YOHO裝修大執過，作為新界牛牛每逢假日都寧願留返喺小城；雖然不同風味菜式餐廳繁多，但元朗區鄉里更多，間間都大排長龍，urban係其中一間流動較快而我較常去嘅cafe。假日all day menu比weekday lunch menu貴少少，一般美式burger、pasta、steak都有，包是日餐湯同指定飲品（凍熱桃茶/soft drink/熱咖啡/熱英式茶。餐湯為龍蝦忌廉湯，龍蝦有四隻，都幾足料，有全盛時期spaghetti house嘅影子🤭 口感一般，唔夠rich，但未至於太稀。 Weekend=cheat day，當然要食吓肥嘢。 Urban慢煮3小時法國肥雞 $168 先唔理係咪用三粒鐘，今時今日氣炸鍋都做到同樣效果🤣 半雞肉質肥厚，皮薄香脆，煮嘅過程咇走哂啲雞油，食落一啲都唔肥膩，但平心而論隻雞無雞味；好在伴碟嘅甜辣醬夠惹味，加咗辣椒🌶️好香口。性價比唔算高，元朗區好多Cafe質素都比佢高，但如果行開商場懶得行嘅可以一試。

#香香食好西 #nearD好西 #食在元朗又係辣妹出動嘅時候💁🏻‍♀️ 聽聞元朗有間出名爆辣嘅撈麵，當然要挑戰吓～～見返呢種中學雞時代成日幫襯嘅冷麵店，好親切🤣🌝 🌶辣度有唔同程度揀，平時食開譚仔大辣完全無感嘅我今次試咗中辣，難得feel到有辣味😳 家姐仲食到不停要飲奶添🤣🤣🤣佢哋嘅辣香口唔麻，食起嚟好開胃，真心有驚喜❗️ 🥗爆撈小食細撈 $38 用香甜粟米做base，撈埋韓式魚片、雞肉腸、蟹柳、蟹籽、魷魚同火腿丸，食材本身清淡，夾埋辣醬唔會過鹹👍🏻👍🏻 火腿丸紮實、粟米爽甜、蟹籽卜卜脆，咩口感都齊哂，難怪咁多人嗌！ 🍜100g蟹籽冷麵 $40 上過雜誌嘅招牌菜—— 4.5包冷麵加100g足料蟹籽，起碼三個人先食得哂。麵質偏冧軟，反而同爽脆嘅蟹籽攞返平衡，冷涼感同蒜香充分刺激食慾，忍唔住一啖接一啖，咁大盒但食落唔飽滯。 🥢經典透明袋裝撈撈麵 $15/3包那些年嘅經典小食，今時今日$15食得飽去邊度搵？同蟹籽冷麵唔同嘅地方係餸菜選擇較多，可以揀幾樣每樣試啲，啱哂眼闊肚窄人士。 📍爆辣冷麵 (元朗) 元朗又新街37-51號又一新城1樓F066號舖

#香香食好西 #nearD好西 #食在元朗呢間打冷我諗元朗人都由細食到大，亦係我同兄弟啤啤嘅不二之選。除咗歸屬感同親切感外，喺無點加價嘅情況下食物水準仍保持到，難怪平日晚上內外都滿哂座。潮州嘢必食滷水鵝片$120，性價比極高，大大份，至少有14至16塊厚肉鵝片；鵝片皮肉分明，冇多餘脂肪但又唔韌👍🏻 底下用豆卜墊底，如果係嫩豆腐就更好啦。脆炸鹹豬手 $110 同樣碟頭大，豬皮炸到脆卜卜，食落唔鹹，唔會越食越口渴；但脂肪略嫌多咗，有啲滯。蠔餅反而麻麻地，粉咁重，入口偏油，唔夠乾爽鬆脆；蠔仔大粒，但數量不多，有幾粒有啲腥。 📍 正記菜館 (元朗) 元朗金輝徑28號好盛洋樓地下4號舖

#香香食好西 #nearD好西 #食在元朗早幾年朗屏站後只有住宅，四周一片荒蕪。估唔到今時今日已改頭換面，不少商舖食肆進駐，發展成一個小區。霓虹燈招牌閃耀奪目，作為真·香港人第一時間就俾呢間港式點心吸引住。元朗區其實有唔少夜茶飲，但精緻嘅新式點心就唔多；好似餐牌上嘅西多士、茄湯鮮竹卷、青咖喱鹹水角、牛油果春卷，令人不禁遐想新舊兩派可以擦出點樣嘅火花🤪款款都想試呀！普洱、香片、鐵觀音、壽眉盛惠$5/位，抵到爛，店員周不時埋嚟主動加水，服務滿分💯 點心一籠兩件，可以試多幾樣，啱哂伴侶嚟撐枱腳，飲茶唔再係一大群人嘅事。燒賣王大大粒，面層係墨魚滑，爽口彈牙；內裡包有豬肉，兩種不同肉質軟嫩爽滑交雜，好食👍🏻 🥟菜苗餃比一般坊間嘅juicy，菠菜充滿水份，吸收哂鮮蝦嘅鮮味，比蝦餃又多咗個層次。 🍆茄子稔軟厚身，淋上燒汁同木魚更提鮮；茄子釀咗蝦肉再炸，有啲似煎釀三寶，但食落又完全唔油，值得一試。 🫔春卷外皮炸得鬆化香脆，內餡為菠蘿、蘆薈、蜜桃同沙律醬，酸甜清爽，加上牛油果增添咗陣獨特嘅油香，不過6嚿得1嚿有，如果再多啲就更好🤣🙈 秋葵碧綠鮮嫩，爽脆無渣，配上芝麻醬，偏向日式感覺。最尾嚟多件西多做甜品～菜如其名，一切開蛋黃流沙餡如瀑布湧出，邪惡爆燈😈 🥞西多士外皮金黃香脆，用咗薄方包同鹹香十足嘅流沙，比傳統煉奶花生醬食起嚟冇咁甜膩，更香口惹味。估唔到飲茶都可以食到出色嘅西多，而且款款點心都即叫即人手製作，上枱熱辣辣👍🏻🥳🥳 呢間絕對值得一飲再飲‼️ 📍8號茶居 (元朗) 元朗宏業南街22號虹方地下3B號舖

#香香食好西 #nearD好西 #食在元朗無論春秋秋冬，每隔一頭半個禮拜都要「圍一圍爐」治吓心癢🤪 呢度每款湯底都唔係湯咁簡單，每款都非常足料，細食嘅剩係嗌個鍋都夠飽！好似呢款酸菜魚（$288），酸菜相信有一斤之多，味道酸甜脆口，夏天食尤其清爽；魚肉為龍躉片，上枱先開始滾熟，更能確保魚肉鮮嫩，唔怕煮到殘散爛。鵝肝墨魚丸（$68@4）嘅配搭富有特色，彈牙唔在講，一咬落去即時品嚐到墨魚嘅鮮。再咬多啖⋯⋯ 油油嫩嫩嘅鵝肝經加熱後轉化成半液態，緩緩流入口中，油香加上海產鮮味絲毫不突冗，反而更豐腴😳😳 牛舌（118）擺放成花胚狀🌹 厚切口感好有嚼勁，比牛肉爽脆，但又帶少少韌勁👍🏻👍🏻 建議淥半分鐘就夠，新鮮肉唔洗淥太耐以免太老☺️ 炸芋頭（$48）幾靚又無渣，經油炸過，拎嚟打邊爐都唔會溶哂，仲可以keep到爽脆口感。以元朗區火鍋嚟講算係高價之選，但對比返食材質素係值嘅😉 📍 大滾友火鍋 (元朗) 元朗鳳攸南街9號好順利大廈一座地下G4-G5號舖

#香香食好西 #食在元朗香港做東北菜嘅餐廳唔多，適逢媽咪生日加父親節提早慶祝，屋企人都中意特色地道菜，就決定試吓呢間開咗無耐嘅東北菜館。餐廳門面同內部裝修都用上大紅色，充滿大中華味道，枱櫈亦順應風格選用木製品。屬於新東北口味嘅菜式選擇並唔多，只有疙瘩湯、羊肉餃、一兩道烤羊等，其實大部份都係上海北京菜。預先ｂｏｏｋ枱時已知會餐廳會帶蛋糕，同預留咗片皮鴨作驚喜，但攞枱時店員就大大聲問係咪留咗，即刻乜驚喜都無哂🥲🥲 服務態度一般，要招手幾分鐘先有人理，不過勝在上菜速度快，唔洗點等。點咗幾道菜，每碟都大大份，價錢平，抵食。 🥟紅油抄手（＄４８＠１０隻）餃皮算薄，正常菜肉餡，但紅油無咩辣味，如果辣啲會更香口惹味。 🥩東北肉皮凍（＄５２）外在晶瑩剔透，能見到包裹住嘅豬皮塊，但筷子夾起易散，質感唔夠彈牙。 🍜麻醬冷麵（＄５８）有辣有唔辣任均選擇，因為媽咪唔食辣所以揀咗唔辣，麵非常足料，配菜同肉絲多；加上麻醬拌勻，冰冰涼涼嘅味道非常開胃，麵條粗幼適中彈牙，有咬口得嚟唔會太硬。 🍤咕嚕蝦仁（＄７８）同樣抵食，第一次見真係有成廿幾隻蝦，而且唔係河蝦咁細隻，蝦仲多過啲青椒同菠蘿；調味酸甜平衡，好開胃。 🦆片皮鴨（＄１６８＠半隻）配有１２塊皮，上枱時仍然溫熱；雖然未至於新鮮烤起，但鴨皮仍脆，加上皮肉分明不帶肥膏，口感唔錯。扣分位係店員唔夠醒目，叫佢哋可以執枱上蛋糕，餐廳標明收切餅費＄５０，但收完真係剩係拎個蛋糕出嚟⋯⋯ 無幫忙插上蠟燭，本應放喺袋中嘅生日刀都遺漏，要提佢哋先喺廚房拎出嚟🤥🙄😪 睇在食物質素同性價比唔差嘅份上可以再戰，但唔會再係慶祝節日嘅選擇。 📍 老掌櫃東北菜館 (富達廣場) (元朗) 元朗西菁街23號富達廣場地下19-24號舖