今日嚟到富臨集團旗下嘅「柞木炭家」，餐廳最大賣點就係用柞木炭嚟燒烤，利用柞木炭取代鐵板燒，以最短嘅時間將食物精華鎖住，不但可以保留食物原汁原味，更加令食物散發出獨特嘅炭香味。 上菜之前，店員會提供多款韓式前菜，全部都可以免費無限添加。而食韓國菜必備嘅韓式泡菜，更加有一砵係枱面，想食幾多就剪幾多。 🔹是日雪下覓炙．五款部位（$488) 「雪下覓炙」其實係指古時韓國嘅皇室貴族喺雪夜之下品嚐嘅燒肉。依家「雪下覓炙」就成為高級燒肉嘅代名詞喇，只有珍貴同優質嘅肉品，先配得上呢個稱呼。 我地今日品嚐嘅雪下覓炙一共有五個唔同嘅部位，每款嘅油脂分布比例都唔同，但係每一件基本上都油香十足，入口即溶。 其中牛胸腹肉肉味最濃，肉汁豐富。 🔹柞木甕漬牛肋骨（$298) 呢個牛肋骨係令我最印象深刻，牛肋骨仲長過我嘅前臂，店員會幫忙展開成適當嘅大小，方便擺上爐上面燒。 牛肋骨用咗韓式醬汁醃製，味道甜甜地，肉質柔嫩。 🔹真露煮蜆（$89) 日式煮蜆會用清酒，而韓式煮蜆就用真露。真露係韓國式燒酒，酒味香濃，但經過烹煮之後，已經無左難以入口嘅感覺，反而更加帶出蜆出嘅鮮味。蜆肉每粒都開口之餘亦都無沙，蜆肉肥美。 🔹韓式年糕（$78) 年糕配上傳統紅辣椒醬，味道香辣惹味。配菜仲有魚板、水煮蛋同埋炸餃子，非常豐富。炸餃子餡料用上韓式粉絲，除左熱辣辣之外亦炸得香脆。 🔹1++韓牛生牛肉石鍋飯（$188) 用上1++最頂級嘅韓牛生牛肉，肉味濃濃，配上滑蛋令牛肉肉質更軟嫩。以石鍋嘅熱力將牛肉煮熟，同時焗出香脆嘅飯焦，口感豐富。 🔹雞蛋蛋糕($52) 蛋糕嘅味道偏甜，可以就咁食，或者擺喺爐上輕輕一燒。 燒過嘅蛋糕特別香口，蛋糕變得微微暖，食落外脆內軟，又重蛋香，意想不到嘅味道。 #thecharcoalroomhk #koreancuisine #koreanbbq #柞木炭家 #柞木 #韓國菜 #foodie #hkfoodie #hkfoodblogger #hkig #foodiehk #hkinfluencer #hkmicroinfluencer #hkblogger #hkkol #omnomnomnom #Eeeeeats #FoodPhotography #FoodPorn #FoodGasm #ForkYeah #Delish #EatingForTheInsta #l4l #f4f