事實上，無話乜嘢食物係糖友一定唔食得嘅，只要日常遵照醫生吩咐定時用藥，保持適當運動及控制每次進食份量，以淺嚐半飽為原則，咁就唔使怕了

琴晚天氣好悶焗，瞓得唔係咁好，今朝好早就起咗身，無無聊聊又唔想自己整嘢食，於是落街去大快活食咗呢份早餐，今日竟然食得曬(平時通粉食一半)，跟住四圍行下，返到屋企閙鐘響(食嘢時習慣調好倒數兩小時)，拿拿聲篤下手指，睇下餐後會唔會升(早餐我跟針、藥，所以一般唔會升好多)，咦！5.2mmol/L，即係代表針藥份量fit到漏油，正！ 以上重點係： ①確診糖尿病患者係絕對需要配合醫學，達致平衡及穩定血糖。 ②詳細血糖記錄(篤手指)有助醫護調整適合自己嘅藥物劑量，當血糖值改善，可以適時減藥(小弟九月到而家，已經減咗三次藥)，所以用藥並非一定越食越多。 ＊圖片內葯物包括：Amlodipine(血壓)、Atenolol(血壓)、Losartan(血壓)、Empagliflozin(糖尿)、Metformin(糖尿)、Pioglitazone(糖尿)、胰島素針劑 改變飲食習慣、配合藥物輔助、加強運動量，控糖就係咁簡單，為乜要用乜乜物物方法虐待自己？使乜花無謂錢去買大堆保健品？點解要捐窿捐罅去揾特別食材？ 真係咁得閒？

【控糖不難，難在堅持】 就小弟個人經驗，忍口比戒口重要，在正常遵照醫護吩咐按時用藥前題下，只要控制好自己嘴巴，堅持淺嚐半飽為原則，再配合適當運動，不論任何食品，一樣可以進食，無需刻意回避，更不用放棄正常社交，照樣可以相約親朋好友，飲茶飯敘，過普通人生活，希望各位糖友一起加油。 …………………………………………………… 以上帖文純屬個人經驗分享，不構成任何責任，每個人身體狀態及用藥情況不同，內容只供參考，如有疑問，應尋求專業醫護人員查詢，特此聲明。 …………………………………………………… 《歡迎介紹糖友加入香港糖友交流分享區，大家可以發帖文分享自己控糖經驗，互相鼓勵打氣。》 圖片是本人真實生活照片，沒有經過修圖，但切勿分享出去，以免被人利用作商業欺騙活動，敬請合作。