【💞萌え萌え初體驗取材後記💞】 女僕Café聽就聽得多，但入去幫襯真係第一次！ 平時店內都係禁止拍攝嘅，今次難得可以拎到秋葉原@home cafe許可，終於可以將女僕Café嘅萌え萌え體驗公開。 老實講直到入去之前都好緊張，自己得一丁友一部機，又係第一次去女僕Café，而且只可以拍一個鐘，真係高難度挑戰。 好彩最後拍攝都平安無事，@home cafe負責人君島都好照顧我，又幫我安排好位置拍，有時又協助我揸機，都叫做順順利利！ 話說@home cafe旗下有幾百位女僕，其中仲有分Ranking：新人、Premium、Super Premium，而被封為「傳說級」嘅更只有1位！ 聽到君島為我安排咗傳說級嘅女僕ヒトミ（Hitomi），真係有啲受寵若驚（明明我係主人......） 今次拍攝叫咗個全包套裝，有哂施魔法、蛋包飯畫畫、寫字等等，最後仲可以同ヒトミ影相留念。 以第一次入女僕Café嚟講，有嘢玩又有紀念品收，真係滿載而歸！ 遺憾嘅係揸著機始終唔可以好跟到女僕做動作，第時有機會真係要唔拍片入去好好歎一次～ 不過拍片又有另類享受嘅，全程都近距離拍，有種玩超真實女僕VR遊戲既視感😗 題外話，等入場期間見到某啲人應該係常客，一嚟到已經好投入做主人角色，真係好似番屋企同自己個女僕傾偈咁自然。 睇嚟我要做到呢種程度，真係要去番三五七次先得！💁🏻‍♂