#香香食好西 每次經過湖光街都見到店員喺門口招徠，充分表現出台灣人熱情好客嘅文化，今日終於有機會一試。 ⚜️ 下午茶餐（$34）性價比高，一小碗主食配三款小食，包普通飲料。 小碗麻醬拌麵 配 滷蛋、涼拌黃瓜、鹽酥雞 主食份量拿捏得宜，麻醬香口惹味，充饑而不飽滯； 鹽酥雞屬瘦肉部位，口感結實又唔會太乾，反而係隻蛋老咗啲。 🍜豐盛牛肉乾拌麵 $74 拌麵已預先拌好，味道鹹中帶微甜，麵質彈牙中帶些許煙韌，幾有咬口，蔥花、青瓜絲擺放一邊自由加添，但青瓜偏老、唔夠爽脆； 配料份量正如其名，牛筋牛腩丸類蔬菜樣樣有啲，筋腩炆得夠稔軟，蘿蔔好入味，一咬爆哂滷水汁。 魚酥皮蛋豆腐 $30 夏天食豆腐冷盤夠哂消暑，木魚削成大片有口感，與旗魚鬆同樣起到提鮮作用，令原味清淡嘅豆腐生色不少； 醬汁略鹹，幸而豆腐份量夠多中和返。 #食在紅磡 #讚好台灣 #我來自台中