我在富安花園打牌撞鬼的經歷 - 上 幾年前，仲讀緊大學嗰時，我同同學好鐘意去富安花園一間酒樓，租張枱打一晚牌。 每個人都係比 $50 就可以打足一晚，冇乜問題一晚都可打幾圈。 有一晚，我同同學又去咗租枱。呢一晚好少人，平時一晚都有兩個大房滿人，只有一間房爆。由於我哋要打花冇得用電動枱，所以只有我哋去咗另一間房開枱打。 一入去嗰間房已經好奇怪，入面有五張枱，就係五筒嘅擺法，而重點係中間嗰張，有晒大燈、茶几、四張櫈同一副擺咗出嚟嘅麻雀，仲要整整齊齊，好明顯係有人特登咁擺，個帶位仲要唔係比嗰張枱我哋，係比角落嗰張我哋。 但係當時仲細，邊理得咁多呀，有牌打就打啦。 我哋張枱，就係五筒咗左下角，我左邊就係中間張枱，眼角都可以見到張枱，而我出事嘅朋友就係坐我上家。 咁我哋就問題打牌啦，亦得準備出事啦！ #富安花園 #馬鞍山 #香港02 #鬼故
我在富安花園打牌撞鬼的經歷 - 中 咁我打牌一直好好手氣，講緊係好到一開牌係三四色雪糕，都可以摸到一手萬子返嚟，我同萬子係特別好朋友，食親大牌都係萬子。 咁我上家次次打牌都好鐘意做十三么，一開始輸錢就會做十三么，有時仲可以一食食幾舖都係十三么，真係唔怕邪，點知今次就出事啦！ 頭頭幾舖都正正常常，點知呢個時候條友就食咗十三么。原本都以為好似平時咁，冇乜問題。點知打打下，條友個面色就愈嚟愈青，唔係白，係真係青，個人又愈坐愈低，好似有嘢騎係上面咁，仲要時不時望向中間張枱咁。 最邪係，佢連續食咗幾舖十三么。 呢個時候我發現佢不停細細聲講緊「比多隻嚟，要多隻，啱啦啱啦。」，我心諗佢應該真係惹到啲嘢。 要記得，牌有牌性，牌都係邪邪哋，平時咁做可能都係同牌講嘢，不過嗰晚個格局，中間張枱擺到明係比「好朋友」打牌用，再加上佢咁講嘢，好朋友都一定唔會打牌，過晒嚟睇牌。 其實呢個時候我都發現眼角有啲嘢係度，不過記得，有乜事唔好講明，都唔好講出聲，最好係大家心照。 不過呢個時候，大家都好似中咗邪咁，除咗十三么男之外，另一個外國仔平時明明好 NICE 好好人，嗰晚都好燥底好易嬲，得返另一個女仔冇乜事咁。 呢個時候有乜解決方法？唔打？停手？出去食支煙？我決定同鬼打運。 上面講咗，我手氣幾好，呢個時候又唔憤氣，心入面一邊屌老母，一邊扣起晒啲一九萬，唔比佢做十三么，等佢唔好積咁多陰氣。 但係真係好奇怪，次次拎齊三隻或者四隻一九萬，就唔會再有萬子入手，講緊係槓起一萬，留三四萬叫雙飛，啲三四萬一定係牌尾，次次都係比條女食三番。 呢個時候外國人愈嚟愈燥，十三么又愈嚟愈青，我又開始燥底，不過好在運搏運我都唔差，結果係十三么男已經連輸幾場，我同個女仔又輪流食，想快快手手打完四圈換位轉房。 呢個時候我又臭串，講咗句 「DLLM，打呀，你打乜我食乜呀 DLLM！」 結果真係，佢打二萬我碰，打四萬我上，總次一打萬子就入萬子，個個唔食就係食佢，一係自摸，再唔係就九章落地包自摸。 就係準備食大牌，十三么男突然大叫一聲！ #富安花園 #馬鞍山 #香港02 #鬼故
我在富安花園打牌撞鬼的經歷 - 尾 佢大叫一聲，然後企咗起身。 原來係突然有個籌碼出面係佢腳面，佢話感覺到，係有人放係佢鞋面。佢伸隻腳出嚟，個籌碼正正放係佢鞋面，正中間，係一個 $10 嘅籌碼。 呢個時候我哋話點都要打埋呢舖，於事又坐返低。咁呢個時候，我叫緊三飛，牌面好大機會嬴到，但係可能因為比嗰一聲嚇到，斷咗條氣，其中兩飛比人碰咗斷牌，結果就係差九萬最後一隻係出面。 九萬，就係十三么牌，而我又知道，十三么男又做緊十三么。 然後我突破有個靈感，好似有人同我講，最後隻九萬係牌尾，尾二嗰隻，一定要拎到。結果好在個女仔碰咗下打亂個順序，比我拎到九萬自摸完呢場。 咁去返籌碼嗰邊，咁我哋開局之前已經數齊晒，拎走咗個籌碼箱，一定唔會多唔會少。咁突然多咗個，仲要係咁唔正常咁放係鞋面。咁我哋數籌碼，大家啲籌碼冇多冇少，即係話呢個籌碼，真係多出嚟。 呢個時候因為我嬴咗，所以呢個籌碼我收咗，亦都係呢個機會，我哋結一次數，青算換房轉枱。 換房先發現，原來成間酒樓得返我哋打牌。 以為換完房之後就冇事，光又光猛啲，而十三么男氣色又好返啲咁。 點知打打下牌，十三么男又開始講嘢，又開始面青，又開始愈坐愈衰。問題係，上次運搏運，我已經打完運，冇可能再同佢哋搏多次。 呢個時候突然又有靈感，打唔到大牌，可以食細牌，總之快快手手打完啲錢，打完呢四圈就會日出冇事。 咁就開始走呢個方向，走向都係一樣，嬴咗幾舖，都係十三么男出沖。呢個時候，十三么男又大叫一聲。 又係有個籌碼係佢腳面，今次係 $100…… 明明數齊碼，明明重新點咗次，點解仲會多咗個呢？？？？ 好在呢個時候都差唔多天光，咁基於傳統，打埋四圈，奇怪係，天開始光，就好多摸和，又好多時候大家都係做萬子，但氣氛好明顯平靜，緩和好多。 咁打完四圈，結果係我同個女仔嬴得多。離開酒樓，太陽一照，成個人舒服晒，呢個時候望到個十三么男，塊面唔係青，係完完全全嘅白，好似鬼上身咁。 咁我哋都叫佢行下車公廟，走返先，唔好直接返屋企，但係呢個時候大家又出奇哋眼瞓…… #富安花園 #馬鞍山 #香港02 #鬼故
我在富安花園打牌撞鬼的經歷 - 完 由於眼瞓，大家冇食到早餐就散隊。不過走之前都叫大家，記得去行下廟先好返屋企呀！ 咁我有間天后廟係由細去到大，小學係附近，放學去補習又一定會行過咁。 咁我返到去，就坐巴士過去，呢個時候個人一直好眼瞓，飲水冇用，食香口膠冇用。一直有個念頭就係︰ 「冇事嘅，返去瞓覺啦，唔洗特登去天后廟嘅。」 不過另一邊就諗︰ 「DLLM，車都上咗，錢都比埋，唔撚係唔去呀？」 我到今日都覺得，係呢種性格救咗我。 去到天后廟，一早已經好多香火，成間天后廟都係煙。平時接觸到呢個煙一定係唔舒服，點知一入去到，冇嗰種乜煥然一新有光乜乜乜，而係好單純，突然間完全唔眼瞓，好精神。 咁我拜晒正面同兩側嘅神位，見到有香油箱就放低一半啱啱嬴嘅錢。一出天后廟成個人7常好多，仲要肚餓，於是就食埋個早餐先返屋企瞓。 點解我話救咗我呢？ 因為事後我先知，十三么男同同學夾錢做生意，比個同事呃走咗幾十萬，仲要借埋錢，結衰咗幾年先還完錢。 其實佢叫人比多隻，比多隻佢，就等於同鬼借錢，而你話啦，借錢洗唔洗還？ #富安花園 #馬鞍山 #香港02 #鬼故
分享古怪靈異事件照片故事
177 Followers
0 Followings
1184 feeds
:background_color(white)/https://avatar-storage.neard.com/cc3926ddabeba1ce01f1c2b52f5640f9.20190816041623.1565928983.2215.jpeg)