FI專欄｜經濟復常 貼街招風雲再現｜Louise 本週一，老友一早往上環返工，經過中環中心時，見外牆貼滿印有金利豐老闆娘朱太玉照的街招，老友立即傳來照片，看內容涉商業糾紛。嘩，真係大新聞喇，雖則朱太已私有化金利豐，在江湖上且戰且退，但話哂都有頭有面，邊個便夠膽咁大整蠱呢？一位在中環中心出入嘅金融師爺報料，原來上個禮拜五已經貼過一次，惟清潔工人立即將街招剷走。未及四出打聽到底發生咩事，又收到中環八卦公來電又一單貼街招，謂中環鏞記旁兩幢吉咗大厦外牆，有一律師被貼街招，指控佢呃女人錢，最抵死係街招貼到高高，想撕掉都有難度，至中午時段街招仍貼在牆上。 估唔到通關及經濟活動復常之後，繼有「丐幫專才」來港搵食，連貼街招事件又再重現中環。又係嘅，Covid期間中環水靜鵝飛，貼咗街招都冇人留意到，就如炒燶股票開演唱會搲銀嘅肥媽話齋：「嘥氣！嘥氣！」 不過股市過去兩個月肯郁，可能有人認為股票有價有市，人窮自然思舊債，咁先至會掀起「貼街招風雲」，打聽返來，主角未必真的欠人錢，好可能喺對家認為可以收到條數，於是用呢種方法施壓迫佢傾下偈。聽講涉及一家成十年前買殼來港上市之民企。 貼街招呢家嘢，以往喺中環不時會發生，熱點係恒生銀行總行嗰條天橋，記得有次「天下第一莊」嘅街招，夾雜埋一百蚊紙從天而降，引來途人起哄，問過一位熟悉古惑仔的人告知，一般追數通上係債主判上判給不同收數集團，收到條數會對拆，去到街招，係收數集團中最低層次也。通常由古惑仔、道友接Job，務求以最平方法去唱通街，使債仔不勝其煩或現身講數，貼街招一般收日薪做嘢。不過，有時貼街招純粹為出出氣而已，幾年前有位慈善大機構總理，借個銜頭在夜場呃無知少女並染上性病，同樣在恒生總行天橋被貼街招，至今其他總理仍記憶猶新，所以貼街招成本低，效益都總有嘅。 註：專欄作者的觀點不代表本網立場。 Fortune Insight 聯乘 《華爾街日報》推出全新訂閱計劃「FI Prime Plus」，只需輸入優惠碼「FIP30free」，即可免費一個月暢讀《華爾街日報》全網內容和Fortune Insight大部份收費內容按此訂閱：prime.fortuneinsight.com/web/wsj Subscribe FORTUNE INSIGHT Telegram: bit.ly/2M63TRO Subscribe FORTUNE INSIGHT YouTube channel:bit.ly/2FgJTen #財經 原文連結：fortuneinsight.com/web/財經/4549737/fi專欄｜經濟復常-貼街招風雲再現｜louise

FI Prime Plus - Fortune Insight