#東涌 #逸東村 十幾年前，我讀緊中一二，阿妹同我爭三歲，即係佢大概小四小五左右。果時老豆返工要好夜先會返屋企，而阿媽正值反叛期，晚晚出去打麻雀唔痴家。 有晚大概夜晚十一點幾，應該係weekend，我覺得屋企好亂好污糟，因為好耐無清過垃圾同掃過地，所以就捉阿妹同我一齊做家務。我掃完地之後就比左袋垃圾佢，叫佢拎出lift口垃圾房掉，然後我就專心掃地。我哋屋企雖然係公屋，但係啲設計好似居屋咁靚，lift口喺中間，好似X字型咁，每邊得2户，所以行去lift口其實幾步就到。 點知我聽到阿妹好急咁跑返嚟，山完鐵閘同木門後，仲要喺防盜眼裝出去，好似好驚咁。我問佢乜料，佢話見到有個長髮白衫嘅女人企喺鄰居門口，全身滴曬水，郁都唔郁，佢好驚果個女人跟住佢返黎。 我聽到阿妹咁講，心入面就好撚驚，但因為係家姐就要扮鎮定安慰佢，然後瘋狂打比阿媽，阿媽果時真係好仆街，打左好多次先聽，同佢講屋企有事問佢可唔可以即刻返，佢好似覺得我哋講笑咁，呃9我地話依家返，然後再打去就飛留言啦。果下真係好撚嬲，但又好徬徨唔知點算，想帶阿妹衝落樓下但阿妹又驚出門口會見到果個女人，加上我哋無鎖匙喺身。。。 以前我哋讀嘅係基督教學校，每人都一定會有本聖經。所以我就拎左本聖經同張被出客廳，同阿妹坐喺沙發度，讀比佢聽。 咁我就背貼窗咁坐，阿妹坐右手邊面對住窗，然後讀聖經比佢聽。讀讀下，阿妹無啦啦個樣好驚咁望住窗出面，我問佢做乜，佢話佢唔敢話我知，然後就瞓低唔望出去，我答咁你唔好講啦，我心知不妙，完全唔敢望後面，只可以係咁讀聖經，讀讀下，阿妹就瞓著咗，而我自己一個人果晚係驚到仆街，雖然天生體質係乜都睇唔到，但依家完全諗唔起果時係點樣捱過果晚。 第二朝，我問阿妹尋晚佢其實見到啲乜，佢話...... 「果個女人喺窗出面得返個頭，望住我哋......」