港語呢個idea唔錯🤭 【我手寫我口】港語學 X 區議會　中西區及沙田辦廣東話徵文計劃 賈雅緻 平時 Whatsapp 打廣東話就多，用廣東話寫文又試過未？「我手寫我口」其實有咩問題，諗起以前學校老師最鍾意都話人作文「口語」，就係中文差、唔要得，呢個標準至今令人不解。但近年推廣粵語書寫嘅團體越來越多，除咗大家非常關心嘅粵語文學期刊《迴響》之外，其實仲有已經成立咗一段時間嘅「港語學」。「港語學」近日先後獲得中西區區議會同沙田區區議會撥款舉行區內廣東話徵文計劃。 「中西區故事」廣東話徵文計劃主題為「寫心聲，無規限；中西情，莫失忘」，旨在培養中西區居民嘅鄉土情懷同人文精神、收集和宣揚中西區嘅近現代史料。作品體裁是以香港中西區為故事背景嘅遊記，字數 1600 字為限，寫景、敘事、抒情皆可。西邊街、餘樂里、匯安里、大平山街、荷李活道等，中西區錯綜複雜的街道，到底蘊含著哪些有趣故事？就有賴各位中西區居民話俾大家知啦！就好似「港語學」所講，「生於斯，長於斯，區民定有情懷所在」，有些故事，只有在此地成長的你，才能說得精彩。 今次徵文比賽嘅入圍作品將被收錄於「港語學」獨立印刷嘅文集當中，予中西區同學以至香港普羅大眾傳閱。 除中西區外，沙田區議會早前亦批准「港語學」撥款申請，舉行「沙田區故事」廣東話徵文比賽，現仍在籌備中，詳情有待進一步公布。唔知小妹住嗰區，遲啲會唔會都搞返個廣東話徵文計劃呢？ 「港語學」嘅宗旨為捍衛香港人學習及使用粵語、正體字嘅權利，以及傳承粵語所承載嘅香港文化。「港語學」一直致力推廣廣東話文化，除每年舉辦廣東話徵文比賽外，近日正籌辦「廣東話圖書館」，廣納唔同以廣東話入文或者同廣東話文化有關嘅書，同時提供書單同資料畀讀者參考。 #我手寫我口 #賈雅緻 #區議會 #廣東話 #中西區 #沙田 #立場博客