黃宗澤（Bosco）2012年同舊愛胡杏兒分手，胡杏兒依家已經生咗2件做幸福人妻；相反黃宗澤身邊緋聞女伴就好似車輪轉咁，一直都未有一個公開嘅固定女友。 要數到最似樣嘅，已係同Bosco因合作邵氏網劇《守護神》而傳緋聞嘅陳嘉桓，陳嘉桓更被拍到多次出入男方寓所。不過最近Bosco被指一腳踏兩船，陳嘉桓仲「無情情」做咗第3者！ 有傳正印女友其實係2015年同Bosco合作拍大陸劇《最好的我們》嘅張沙沙，近日女方仲嚟香港「宣示主權」！Bosco今個月13號39歲生日當日，女方高調去到佢開工嘅片場探班，仲Post與同場嘅鄭嘉穎嘅合照去社交網，而Bosco嘅背影就喺相中出現，真係唔知係百密一疏定係有心「公開」。另外亦有指今年中秋二人蜜遊日本，關係非比尋常，傳陳嘉桓因為咁要遷出Bosco寓所搬往尖東嘅酒店暫住，情況非常尷尬！ 不過對於這個傳聞，Bosco就全部否認：「當笑話咁睇啦！佢2個都係我朋友！」而陳嘉桓就斬釘截鐵劃清界線：「我同黃生只係朋友！」