紅酒煮三色豆 三色豆推廣大使（勇者模式） 由於屋企有啲平價紅酒（三四十蚊支嗰啲），煮mulled wine又煮到厭，想試啲新啲嘅方法用咗啲酒佢，見人平時會紅酒煮牛肉，咁我就決定不如整個紅酒煮三色豆，試下伏。 煮法極頹，只係倒約200ml 紅酒落煲，煮熱然後直接倒啲急凍三色豆落去，凍都懶得解。因為紅酒以煮嘢食嚟講會有啲太酸，所以我都加咗三茶匙糖落去。 酒微滾煮3至4分鐘就上碟（其實係碗）。另外留咗個煲入面三份一嘅酒用嚟飲。 結論係杯酒最出色，因為煮過又加咗糖，提子汁咁嘅味，唔會難飲得去邊。由於紅酒唔算好入味，所以啲三色豆大致上都係保留返原本嘅味道，當然食落係會有紅酒味嘅，但兩樣嘢唔算太夾，所以衰過就咁滾水淥三色豆。 唔知係紅酒嘅酸味有開胃嘅效果，定係個身體想當冇食過呢一餐，食完都仲係肚餓想再食嘢...... #三色豆 #紅酒 #好煮意