#網民講鬼故 雷生春好猛鬼 對面嘅劏房都唔輸蝕…… 位於香港九龍旺角荔枝角道及塘尾道交界嘅雷生春係香港著名嘅鬼屋，雖然雷生春已經翻新過，但依然偶有傳出靈異事件。 我一個人住係深水埗雷生春附近嘅劏房，講起猛鬼，附近嘅劏房都唔輸蝕。深水埗出名多劏房，呢區舊樓多，窮人多，有近油尖旺，品流複雜。住劏房嘅人咩人都有，有一家大細，有情侶，有人吸毒，有妓女亦有獨居男女，亦有南亞人同黑人。 我住係雷生春斜對面，我間房都望到雷生春，幢大廈有好多單位都係劏房，我住嗰個單位業住就劏成咗四間房。我個單位有一對情侶，一個南亞人，同一個獨居女人。嗰對男女就成日同我講嗰個女人帶男人上嚟，話佢係妓女。個南亞人就好少有交流，至於個女人，我真係無咩點見過佢，可能係我工作時間關係啦。 有一日隔嚟房嗰對男女問我，夜晚有無聽見個女人好大力閂門，連續幾晚㗎喇。我話無喎，可能我瞓得冧啦。佢地話唔係喎，真係好大聲喎，無可能聽唔到。 我心諗，你地想我認同你啫，有咩你同業主講囉，我真係聽唔到丫嘛。 跟住嗰晚，十一點幾突然有人敲門，原來係嗰對男女問走嚟問我啱啱聽唔聽到個女人好大力閂門。我話無喎，可能你住正佢隔嚟啫。佢地真係好煩，係都要叫埋我去敲門睇下嗰個女人係唔係度。 我唯有陪佢地癲，佢走去敲門敲咗三四分鐘都無人應。突然間有把女人聲答：「無人呀！」 當真係聽到有人答你無人嘅時候，你會諗有人玩嘢定點？我會覺得係玩嘢。但咁啱嗰個女人就返到嚟，我地頭先三個人都聽到裡面答無人。 第二日，嗰對男女同我講咗樣好得人驚嘅嘢。佢地話，佢地一早起身成間房嘅嘢亂晒，仲叫我入去睇。我睇到真係，而最奇怪嘅係，成地都係好似狗毛嘅毛。 佢地話，佢地估嗰個女人養咗隻狐仙喎，佢地住多咗一個月就搬走咗。而我就心諗，我無攪佢，佢唔會攪我。你以為真係唔會攪你咩？有一晚冬天，我返到去揭開個被竇，我見到有好多毛....最後，我都係決定搬走……