覺得懷舊~《小露寶》主題曲片段 ------------ 小露寶全身紅色，手臂同成對腳係銀色，好似風琴管咁款，對手好似蟹鉗咁；佢頭頂有支小小嘅天線，肚腹打開蓋之後會見到裏面嘅機件，具有一百匹馬力；背後有支可以收得埋嘅直昇機扇葉，幫佢飛行；而當雙腳收埋可以換成一對車轆畀佢喺路上飛馳。 ------------ 小露寶係1974年嘅一套日本真人扮演（特撮）兒童電視劇裏面主角嘅香港譯名，亦係套劇嘅片名。呢套嘢嘅日本名係『がんばれ!! ロボコン』，曾於1974年10月4號至到1977年3月25號期間喺日本NET-TV電視台放映，香港粵語配音版就由當年亞洲電視嘅前身－－－麗的電視播映，全套有成118集，而佢嘅原作者就係石之森章太郎（當時佢嘅名只係就咁叫做石森章太郎）。 劇中嘅主角小露寶係一間機械人學校嘅學生，呢間學校專門訓練啲機械人學生成為人類嘅好朋友，因應每個學生嘅本身設計嘅特點嚟到幫助人類嘅日常生活、建設社會，每次返學嘅時候，鋼鐵老師就會因應學生喺人類社會上所貢獻過嘅事而畀分數，差得好緊要嘅就得最低嘅零雞蛋，而做得好好得到一百分滿分嘅學生重會獎一個心心貼紙擺喺個身上，作為可以成為A級機械人嘅模範標誌。小露寶屬於家務機械人嘅種類，俾老師安排喺社羣嘅家庭度幫手做家務，可惜佢係一個好鬼大懵同埋經常擺烏龍嘅機械人，成日一心諗住幫助人類，點知好多時弄巧反拙變成闖禍連連。 佢喺頭一二年班嘅時候寄居喺姓大山嘅屋企入面同大山家嘅人一齊生活，而到咗第三年就寄居喺姓小川嘅屋企。因為佢嘅大懵加上衝動嘅性格，於是成日帶畀寄居家庭同埋週圍嘅人好多麻煩，亦因此佢成日都係得零分，雖然佢有一班好好嘅同學仔，有啲咩事都會出手幫佢，但好多時都改變唔到闖禍嘅結果。 咪以為小露寶係一個機械人就應該咩都冇有怕，其實佢嘅最大敵人，就係細隻過佢好多，但係無處不在嘅曱甴，每次一見到曱甴就嚇到發晒癲完全失控；而第二恐懼正是佢同學仔小吱喳手上面嘅大針筒。 #懷舊 #小露寶 #童年回憶 #70年代