4月將會出現「超級粉紅月亮」及「天琴座流星雨」兩個天文奇觀，有興趣嘅朋友就要記低預測日期及時間啦！ 「超級粉紅月亮」 「超級月亮」係指滿月前後見到較大嘅月亮，由於月球圍繞地球公轉嘅軌道係橢圓形，因此月球有時會比較接近地球，所以就可以見到比平時更大更亮嘅滿月。因為4月嘅滿月又稱為「粉紅月」（Pink moon），所以今次就係「超級粉紅月亮」！ 雖然叫「粉紅月」，但其實月亮並唔係真係粉紅色，「粉紅月」呢個名嘅由來係因為4月係粉紅色「福祿考花」（Pink Creeping Phlox Flowers）盛開嘅日子，所以就有呢個咁浪漫嘅名字。 而今次出現超級粉紅月亮嘅日子將會係4月26日，預計大約喺夜晚11點33分左右會係最亮！ 「天琴座流星雨」 「天琴座流星雨」每年4月下旬都會出現，係因為地球穿越佘契爾彗星（C/1861 G1），彗尾留下嘅塵埃帶而產生，通常流星會係中等亮度。 而今年「天琴座流星雨」出現嘅高峰期係4月22日嘅夜晚9點，預計一個鐘有機會可以見到約20顆流星，建議觀測時段係夜晚11點至第二日嘅清晨5點。 至於去邊到睇流星雨係最好？建議大美督、大坳門風箏場及西貢萬宜水庫天文公園都係觀賞流星雨嘅好地方！ 睇唔到流星雨嘅朋友都唔好忘記4月26日夜晚抬頭望吓個「超級粉紅月亮」啊！ #超級粉紅月亮 #天琴座流星雨 #粉紅月亮 #流星雨