《數碼暴龍 LAST EVOLUTION 絆》影評 如果你係睇數碼暴龍長大嘅，你唔會想錯過呢一套戲。由於唔想劇透，所以會盡量避重就輕咁講劇情。 好多入場嘅觀眾都係25至35歲嘅男仔，成班人一齊去睇，走嘅時候仲聽到佢哋嘻嘻哈哈搭晒膊頭咁話：「頂！洗唔洗喊成咁啊？」情侶都唔少，好多人睇緊嘅時候拎紙巾，當然我自己離場嘅時候都有換過個口罩啦，唉濕撚哂唔撚驚。 今次呢一套係20周年紀念作品，有返初代嘅主角同埋亦都會播耳熟能詳嘅OP Butter-fly同進化歌Brave Heart，當然都有戰鬥畫面，同埋亞古獸進化嘅經典場面（見到佢係度轉轉轉已經好感觸），亦都有最強螢幕情侶天使獸同天女獸（太一同大和）合作。 主線嘅反派角色嘅內心戲都好容易理解，而且我相信有好多唔捨得身邊親人或者寵物嘅人都會明白佢嘅掙扎。如果唔想失去，係咪應該放棄成長？只要唔向前行，就唔需要接受呢種痛苦？ 《數碼暴龍》係我哋嘅童年，象徵着我哋每個人都細個，曾經有唔同憧憬，我哋有冒險同闖蕩嘅勇氣。 亞古獸從來都冇變，巴達獸都係咁得意，佢地唔會改變，但係我哋每一日都變緊。我哋變得圓滑、變得學識承擔，我地要為自己嘅人生作出好多選擇。我地嘅圈子越嚟越窄，要做嘅事越嚟越多。時間不斷溜走，而我地都敗給現實，日復日咁返學返工。 我諗呢套戲最主要令人喊嘅位除咗係主線之外，亦令到我哋反思到成長之後仲有冇「可能性」。人長大咗，係咪會逐漸被社會同身邊嘅人影響，迫使自己去選擇一條路，而放棄無限嘅可能性？當所有人都搵到屬於自己嘅未來，有啲人去做醫生律師，有啲人將興趣變成職業，而你仲未settle。有啲人甚至訂婚結婚生埋仔，但你仲係渾渾噩噩咁。大學畢業之後踏足某一個領域就好難再改變，似乎無得好似小朋友時有咁多選擇，其實會唔會係我地成長之後就局限左自己？ 被選中嘅細路啊，無論以後個世界係點，我哋之間嘅羈絆唔會隨着時間同空間而消失，一齊長大嘅回憶將會陪伴一生，「我們會一直在一起。」 我哋都應該勇敢向前走，就算幾多歲都好，只要我哋相信，就絕對有可能性。就算我哋仲未搵到人生嘅目標，甚至連初衷都慢慢忘卻，無論當初嘅純真仲喺唔喺度，我哋珍而重之嘅好朋友係咪仍在身邊，「明天......我們......」就繼續勇敢向前。我相信，總會搵到的。 一齊去食蜜瓜味刨冰啦！ 評分：9/10 #晞嵐 #數碼暴龍 #LastEvolution絆 #DIGIMONS

好文分享 學歷會唔會影響兩個人嘅感情？ FROM #晞嵐 讀者問我：「學歷會唔會影響兩個人嘅感情？」 會。但真正影響兩個人嘅感情唔係嗰張成績表同證書，而係各自嘅價值觀同能力。而呢兩樣嘢係會直接被學識、成長經歷影響。 我舉幾個例子── 全球Top3大學畢業VS香港三大畢業 外國U畢業VS Asso High Dip 畢業 大學畢業VS預科畢業 現實咁睇，如果呢啲組合嘅人行埋一齊，你都會覺得佢哋無論係見識定係溝通方面都有一定距離。但係你話係咪真係好大問題，中間真係會好大差距？又唔一定。 可能係啱啱讀書或者畢業嘅人先會覺得距離好遠，但社會上有好多對情侶或夫婦都可能係咁。你都聽過有啲名校富二代揀啲冇乜讀過書嘅靚女；名校律師醫生揀個俏秘書俏護士；白手興家叻仔搵個外國U千金；仲有一大堆讀過下書嘅老闆仔配預科畢業家庭主婦等等。 佢哋本身背景唔同都依然互相吸引，咁一定係佢哋之間有啲特質可以互補。讀得書嘅人又唔一定真係好叻，好多人只係識考試。而好多人未必識讀書，但係工作能力非常高。其實用「學歷」兩隻字好難概括整件事。 如果對方唔介意你同佢嘅學歷或背景有差距，其實你自己都應該諗吓係咪有啲咩地方吸引人？有時唔係淨係講自己有咩條件，而係你喺段感情中為對方帶來啲咩？ 我擇偶一定唔會淨係睇佢嘅學歷，而係睇對方有冇內涵。與其去留意佢有冇邊張沙紙，不如睇佢鍾意講啲咩話題，價值觀係點，有冇理財觀念同自省能力，有咩目標，思考同溝通有冇邏輯，識唔識人情世故等等，呢啲全部野都係可以反映到一個人係咪適合你。