#尋人 尋好人 成日話好人一世平安，唔知呢位先生，今日安好嗎？ 時間返到四十幾年前，有一個媽媽一拖五個細路去到羅湖火車站，人生路不熟、人民幣未唱到，幾個細路又係咁嗌肚餓。呢個時候，一個好心人出現，塞咗40蚊人民幣俾呢位媽媽（仲係100蚊港紙先唱40蚊人民幣嘅年代），叫佢快d買嘢俾細路食，唔肯收返錢，放低張卡片就走左。 一件好人好事，呢位住廣福既媽媽一直記喺心入面，佢今年已經80幾歲，希望有機會親口同呢個先生講聲多謝。當年張卡片都一直keep好喺銀包，可惜7個字既電話已經打唔通，廠亦都已經搬走埋。 如果有人識得呢位黃日光先生，可唔可以揾揾我哋，我哋可以同返婆婆講。 最後，想講多兩句。大家應該有疑問，其實區議員係做咩，咩議會工作、社區問題跟進、做case⋯ 即係點？ 對我嘅身份嚟講，自不然每個要求都係case。好老實，10個case可能有一半都係呢個制度解決唔到，當中每個人嘅故事亦都係我以往想像唔到。「可憐之人必有可恨之處，可恨之人必有可悲之苦」，呢句嘢怪呀可，魯迅話如果你諗返孔乙己，可能會明明哋呢句嘢講咩。 好多時街坊想拎蛇齋餅糭、唔識/唔想填表、爭人錢x2046等等嘅情況只係喺佢人生累積嘅結果，而呢個結果，成長嘅背景、價值觀、呢個制度都有份造成。而社會睇呢啲情況係case定係人，就係我哋嘅意識問題。要「光復香港」，仲有好多嘢要做。 #連桷璋