[轉貼] 偽黃店之越男仔 De Viet Son （長文） 分享一個不吐不快嘅飲食經歷 琴晚同屋企人2人係喱間越男仔餐廳食晚飯、結果食到一肚氣！ 話說係8月中係人民超市以$78買左$100 coupon（共4張），當時人超職員特別聲明只可係沙田花園城個間店先可使用，因本人住沙田區，所以就買了4張試試，打算都係撐撐黃店，就決定琴晚去堂食。 交待番背景資料，coupon後面嘅條款細則 ： 1）無寫到限午市或晚市 、 2）沒有最低消費額、3）沒有指明一次只可用一張、4）無寫到不可與其他優惠同時使用等 （可睇圖中條款）。 首先，去到鋪頭外面見到貼出張A4紙 ，紙中表示”只限晚市堂食使用優惠劵”，係張coupon當中睇唔到只限晚市堂食，如果有人買黎for午市食咪麻煩？而且開始晚市堂食番都唔係好耐。 然後我地入座睇緊餐牌，當時餐廳姐姐表示堂食飲品有半價優惠。當點餐後，然後向餐廳姐姐表示有2張coupon會係今晚用，而餐廳姐姐就講：咦！唔知呢d劵用唔用得，要問下老闆先。 我：點會唔用得啊，又冇過期、又真金白銀買番黎，應該好多人都用緊架。 過左5分鐘到，餐廳姐姐走埋黎同我地講：同老闆電話傾左，老闆話今次last可容許我地用埋呢2張coupon。 我：今次用2張？ 但我都仲有2張啊！可唔可以今次用埋呢？ 餐廳姐姐：你之前講2張，所以老闆話比你哋用2張，如再有 以後係 食滿$300先可用1張。 我：吓！要食滿$300先用1張，但張coupon無寫明要食滿幾多先用1張同埋無寫明每次只限1張喎！ 餐廳姐姐：無架，我地餐廳，係代表我地擁有最後話事權。 我：嘩，你咁樣一句咁彈出黎，但背後coupon細則就無你講嘅野，咁樣唔係好公平喎！ 餐廳姐姐：我都明，但因平時我地都無點做開呢d coupon，而都只限一枱用一張，同埋要食滿$300先可用1張。 我：我反問咁coupon當中嘅條款有咁寫？ 餐廳姐姐：我地咁樣做當中都係發生過不愉快經歷，就係有客係晏就黎用d coupon，所以老闆自此就唔准午市用coupon，另外都話無再同個邊機構合作賣coupon。 我：但係餐飯外面同入面你地都無寫明每枱一張&每張枱滿$300先用得喎，咁今次點？ 如是者佢有佢講，我就繼續睇番張coupon既細則去同佢講道理。 我屋企人：不如你打俾老闆問下另加個2張可唔可以今次用得埋就最好，唔得就算數，今次用2張。 過多幾分鐘，餐廳姐姐表示：問左老闆都可用，但要食滿$800就可今晚用4張coupon。 我同我屋企人表示🙄：咁味即係個套logic..原本頭2張你唔洗我食滿$300用1張，而第3.4張就要我食滿$300先用1張，2個人點樣係間越南鋪食滿$800而用你個4張coupon啊？ 最後，我地都只能焗住用2張coupon。而餐廳姐姐走埋黎講：由於你地用左coupon，所以餐飲半價呢個優惠不能同時使用。 🙄🙄 （心諗：你張coupon邊隻字寫明不能與其他優惠同時使用）。 總之貼錢買難受，仲會播cctvb節目，服務態度又唔係好，仲要收加一，總而之cp值唔係高（真心）。 偽黃店，不了👋🏻👋🏻 #沙田 #石門 #偽黃店