【美國情況更新：天佑美國】 經過連續七日，由示威演變成騷亂之後，美國各大主要城市的騷亂仍然未有停止。 當好多人目光集中喺暴亂之中嘅打砸燒畫面，其實尋日美國發生咗好多事，其中幾個熱點如下： 1，George Floyd 最初嘅驗屍報告話佢係死於毒品以及併發症，家屬另外進行獨立驗屍，驗屍報告確認頸背受到壓迫致死。令最初嘅官方驗屍報告變得不可信。 2，為咗開路畀特朗普去白宮附近一座歷任總統用嚟祈禱嘅教堂， 警察同國民警衛軍用催淚彈及橡膠子彈驅散和平示威嘅人群。除咗令該教區主教覺得震怒之餘 （ 因為特朗普只係去教堂前面拎起聖經影張相，並非到該處祈禱，更使用武力），左翼媒體如CNN及MSNBC對此事群起攻之。 3，肯塔基州路易維爾市（Louisville）有警員射殺一名示威者。 由於警察未有配戴body cam 而未能提供現場證據，市長將警察總長解僱。 4，美國多個城市發出宵禁令，然而紐約、芝加哥、 LA等地仍然未能遏止搶掠。 今次所以係幾個大城市發生猛烈嘅連鎖反應，最主要係一種積怨嘅爆發。LA 喺1992年就已經因為警察虐待而引起暴亂。LA好多地區治安惡劣，收入低下，有色人種同警察嘅衝突早已經係無日無之。 有好多人亦都唔知道，紐約市五年前另一名警察亦係用過度武力去拘束一個無辜嘅黑人男子，亦係冇理會該男子聲稱無法呼吸，最後引致死亡。 所以話今次George Floyd 其實係“I can't breathe 2.0”。更令部分民眾憤怒嘅係，該名警察經過五年官司之後，除咗被解僱之外，最終無罪釋放。 係呢種前提之下，民眾的怒火當然唔係咁容易可以平息。 不過好衰唔衰，有少部分人根本唔在乎示威係為咗種族平權，只係乘機趁火打劫。著名嘅紐約第五街以及芝加哥嘅密芝根大道，名店都被大肆搶掠。就係星期二凌晨，更加有暴徒嘗試搶掠地標性嘅Macy百貨公司。咁嘅情況警察及國民警衛軍對呢啲人作出拘捕就係合乎情理。不過無論一般嘅中國民眾，以及不少香港人，對美國嘅印像都流於鎗枝與暴力既刻板印象，所以只會對部分畫面執到金咁樣幸災樂禍或者放大解述。 但係美國呢幾日引起咗好多相關嘅討論。司法機構同埋警察部門都相繼承認，司法制度一直未能對黑人作出公平公正嘅審判，警察亦存在種族歧視問題。 今次之後好有機會好似#metoo 一樣展開大清洗，以強硬方式改變制度之內嘅種族歧視問題。有好多地方警察，都表達出相當嘅誠意，願意同民眾一齊解決分岐。呢啲畫面，鍾意睇美國仆街嘅人當然唔會睇得到。 另一方面，矛頭亦都指向特朗普。因為特朗普上任之後縱容種族主義及右翼思想，令今日情況一發不可收拾。與處理肺炎疫情一樣，特朗普除咗將問題推畀其他人之外，並無展示出如何解決問題嘅誠意。當特朗普正準備用同中國開戰，黎維護自己嘅選舉之外，而家突然後欄失火，特朗普政府真正係自顧不暇，香港人要再捱多陣，先至可以等焦點返返去中國同香港。 其中咁多報導之中，最備受忽略嘅就係，好多喺今次事件中使用過分武力嘅警員，都係短時間內受到懲處。 直接跪頸嘅警員，今次仲可唔可以好似紐約嗰個咁側側膊唔多覺，恐怕就冇咁易。 整體嚟講，今次騷亂雖然造成唔少人命財物損失，但係亦都畀機會將好多問題擺上更重要嘅議程。浴火重生，今次可能係對黑人平權係一個好大嘅機會。 喺美國，警察係每一個市政府用預算請嘅。 做錯事，市長一樣可以炒魷，人民就係警察嘅老細，警察冇特權可以可以做一啲傷害他人嘅事情。疑犯人必須經過公平公正獨立嘅審訊先至能夠判刑。但係而家香港警察已經當咗北大人係佢哋老細(但係香港納稅人出糧喎)，佢哋已經係肆無忌憚，亦都唔會畀人查。咁嘅樣，又點會得到香港人嘅尊重？香港人又點可以唔憤怒？ Anyway, 事情仍然未完結。特朗普呢種爛仔同小人，對美國係冇乜好處，但係我哋卻需要特朗普呢個爛仔去對付中共。世界情勢環環相扣，多啲睇新聞， 唔好嘥時間同五毛筆戰。 就趁而家增值自己，擴闊視野，香港人加油！