草泥馬（羊駝）唔止外表可愛，佢哋血液內嘅抗體仲有望幫助人類對抗病毒！🤣 根據外媒報導，比利時佛蘭芒生物技術研究院（Vlaams Instituut voor Biotechnologie）同美國德克薩斯州大學奧斯汀分校（The University of Texas at Austin）聯合研究發現，草泥馬身上嘅抗體有對抗新型冠狀病毒（武漢肺炎）嘅能力。 研究人員分離出草泥馬身上2種抗體，草泥馬血液中嘅抗體比人類抗體更細，容易透過組織攻擊病毒，所以可以有效阻止病毒嘅棘狀蛋白（spike protein）侵害細胞。研究人員仲發現草泥馬嘅相關抗體同人類抗體融合後，會產生一種「雜交體」，可以中和新冠肺炎（武漢肺炎）病毒。加上抗體對唔同溫度、酸鹼有一定耐性，容易大量生產，被視為係免疫學一項重要研究。 其實草泥馬抗體過往多次發現喺醫療上有重大作用，曾用於研究愛滋病病毒，後來發現對嚴重急性呼吸系統綜合症（SARS）同中東呼吸綜合症（MERS）等冠狀病毒有效。 資料來源：Tech Times #武漢肺炎 #新冠肺炎 #COVID19 #比利時 #美國 #草泥馬 #羊駝