FI專欄｜飲食界壞孩子｜Louise 把嘴講嘢又吋，又識食嘅「中環吋嘴」楊國佳，最近被他的紅酒腳封為「飲食界壞孩子」，揶揄他以往寫食經有彈冇讚甚至「踩」人無數，係繼股壇壞孩子馮永祥及馬會壞孩子「發仔」之後，又一壞孩子。楊國佳反駁：「我冇咁崇高，冇立心去做壞孩子，呢個唔喺我嘅初心，只不過係想保住香港美食天堂呢個朵。過往香港食肆從業員俾大陸佬縱壞哂，以為貴就係好嘢，擺到成枱都係餸，最後夾兩嚿就唔食，咁樣浪費食物 係暴殄念天物。」 兩杯茶一個壺 佢老哥話過去三年疫情下，大部份食肆跌哂Watt。上週在半島酒店歎聖誕午餐，柯打兩杯伯爵茶，但只係用一個茶壺來serve，佢已經念念有詞謂以前兩杯茶分開兩個茶壺的，斷定半島縮皮啦。嘆經濟環境變化，無奈都要接受。眼利嘅佢抬頭望大堂聖誕樹頂上一個蝴蝶結裝飾，得知聖誕樹乃是由Chanel贊助，因此有其招牌置樹頂，佢大彈：「都睇唔到Chanel個logo，好似鬼佬葬禮擺設，失敗！」 小小幫襯 多多貼士 佢老哥話初初寫飲食專欄，想話「提點」啲飲食從業員，等佢地有進步空間，但啲友仔以為佢想搲著數，「以為我好似啲飲食blogger咁，總之我嘅宗旨係：搞搞震，小小幫襯，多多貼士！俾足貼士好過寫張大菜單啦。」佢其實經常雪中送炭，相熟食肆經理生意不濟之時，就會call佢幫下手，佢都甚少托手踭。好似聖誕期間，到半島酒店出席飯局，在大堂碰到相熟既經理，就幫襯買幾個Hamper，並立即轆咭落單，見半島推出自家制既聖誕Panettone都二話不說買幾個，等經理交下功課。所以佢把口雖然對飲食從業員特別harsh，但見佢就好似蜜蜂褸蜜糖咁。 野生禾麻宴客 前週他在東亞銀行總行頂樓的私家飯堂宴客，其中一道菜是「十二頭正日本野生禾麻鮑」，中環吋嘴大讚連碟上鮑汁都清埋，謂：「呢啲鮑汁鮮甜㗎，唔同食法。」大廚出場跟他打招呼，得知他師傅是前福臨門「安叔」更另眼相看，立即從胸口拿出封大利打賞給呢位大厨。要保持香港美食天堂個朵，要多些好似佢老哥咁嘅食客先得！ 註：專欄作者的觀點不代表本網立場。 Fortune Insight 聯乘 《華爾街日報》推出全新訂閱計劃「FI Prime Plus」，只需WSJ官網原價三分一價錢，即可同時暢讀《華爾街日報》全網內容和Fortune Insight大部份收費內容按此訂閱：prime.fortuneinsight.com/web/wsj Subscribe FORTUNE INSIGHT Telegram: bit.ly/2M63TRO Subscribe FORTUNE INSIGHT YouTube channel:bit.ly/2FgJTen #生活 原文連結：fortuneinsight.com/web/專欄/4229462/半島酒店-飲食業-楊國佳-聖誕

FI Prime Plus - Fortune Insight