【東京電玩節 TOKYO GAME SHOW 2019後記】 　 嚟咗日本兩個月，前前後後都出過好幾個活動，但遊戲展真係第一次！ 　 展場同上次C3AFA TOKYO一樣，都係幕張展覽館（幕張メッセ）。不過規模就完全唔同，C3AFA TOKYO只係用咗3個Hall，TGS用盡哂8個Hall，可以話玩哂成個幕張展覽館。 　 雖然我不諳遊戲業界，不過呢次活動體驗真係好深，完全感受到日本遊戲業界真係一大產業支柱！ 　 好似今日明明只係Business Day，但朝早入場已經人山人海，單係排隊拎Media Pass都排咗20分鐘。 　 入到會場，每個攤位嘅設計都明顯課咗好重金，無論係裝潢定Show Girl嘅數目都遠遠超出我至今去過嘅活動！ 　 而好似BANDAI、CAPCOM等等大公司仲安排成Team人，喺Booth後面分好哂小隊，有啲負責應對海外傳媒，有啲負責翻譯，有啲負責內容查詢，完全感受到日本遊戲公司係有幾大規模😧 　 其中有一個Hall係集中嚟自日本各地嘅遊戲設計學校，仲有唔少學生設計嘅作品都好高質。雖然讀呢類學校畢業出嚟，唔保證個個都可以做呢行搵飯食，但至少起碼喺日本讀遊戲設計可以係一種出路，係一個選擇。 　 可惜喺香港，要將對遊戲呢項興趣發展成為一種專業，似乎暫時都比較難......😢 　 不過，希望假以時日，香港鍾意ACG嘅人，都可以將ACG行業當作一種出路💁🏻‍♂