杜汶澤啱啱開完《香港企硬》talk show，今日佢喺《喱騷》fb正式公佈，《喱騷》嘅節目會搬離facebook同YouTube，由12月2日起放喺全新嘅《喱騷》app，自創港人娛樂王國，呢個app仲會全球都有得睇。 今日《喱騷》upload咗阿澤嘅新片，阿澤企喺舞台上面，話香港嘅娛樂同好多嘢都一樣，已經走到一個見唔到未來嘅狀況，原因好簡單，電影公司或者電視台老闆嘅立場同取向決定一切，關鍵就喺個老闆身上。阿澤作為《喱騷》CEO，佢透露今後唔會喺facebook同YouTube睇到《喱騷》節目，因為佢會開創自己嘅app，將創作自由障礙減到最細，由網台發展到一個真正嘅電視台，藝人仲有黃秋生、王宗堯、田蕊妮、陳漢娜、莫竣名、莊韻澄、胡希文、郭小杰。而《喱騷》app係收費嘅，月費60蚊；開台優惠俾600蚊就可以成為VIP，收睇12個月節目，可以獨家收睇《香港企硬》，嚟緊嘅節目仲有《黃秋生大師班》。 阿澤喺條片度話：「香港人點解養唔起香港人，我作為公司單一最大股東，我嘅選擇就係如果要拍嘢，梗係要拍俾香港人睇。I have a dream，只要有足夠嘅資金，我哋就可以建立一個真真正正屬於香港人嘅娛樂王國。我嘅願景，唔單止係綜藝節目，我相信我哋可以擁有自己嘅電視劇、自己嘅電影，我要俾所有有良知嘅藝人、有潛質嘅新人，都有自己嘅發展空間。呢個世界、呢個時代，根本唔需要有娛樂大亨，我相信觀眾，即係你哋，先係真正嘅娛樂大亨。」 《喱騷》app宣傳片： fb.watch/1ZPo5ghjHV #喱騷