「大隻仔」溫家偉上年離開合作咗10年嘅TVB，去新加坡發展。佢參演嘅劇集《Last Madame》網上播放量打破當地紀錄，更喺釜山國際電影節中勇奪「最佳亞洲戲劇獎」。 溫家偉2008年參選《香港先生選舉》，雖然落選，後來加入無綫，鬼仔性格同健碩外型逐漸為人熟悉，更有「大隻仔」外號。 佢喺大台發展唔算十分順利，一開始因為喺外國返嚟，獲安排喺明珠台做天氣先生。之後主要喺擔任綜藝節目嘅主持，甚少演戲，就算參演電視劇亦多數做閒角。 溫家偉加入大台10年，舊年宣佈離巢去新加坡發展。 雖然香港觀眾好少見到佢，但佢喺新加坡發展順利，於電視劇《Last Madame》中，飾演女演員Fiona Fussi未婚夫Harry，有唔少戲份。 劇集成績非常好，喺網上播放量連續7日排第一，打破當地紀錄。更勇奪韓國《第25屆釜山國際電影節》「最佳亞洲戲劇獎」！ 除咗喺新加坡演戲外，溫家偉仲有個人Youtube Channel，有唔少片嘅點擊率都過10萬～ #大隻仔 #溫家偉 #離巢 #新加坡 #釜山電影節 #香港先生