紅面具今日又黎講 #黃店之亂 最近最大粒花生係光時管理層原來收十萬人工？😰 紅面具個人認為呢篇可信度都幾高～ 之後會PO埋光時既回應🙈 #只望大家一齊進步 #仲有同人辦館OurHKMall都可以支持下 #非分化 #黃店花生 #光時HKongs #光時 TLDR: 光時義工轉全職時以天價人工挖自己角，再刻薄手足。要求光時交代及找回初心。 光時既初心係好：想由義工建立公司架構，再用黃色經濟圈黎養活手足。但係由義工轉受薪個刻時，一切已經變質。 今年初開始，光時係由4個義工分別管理唔同部門： P君 (Sourcing+IT)、 K君 (CS)、 O君 (Marketing)及 B君 (Logistics)。 三月時佢地4個討論過由義工轉全職，其中P君和K君打算留任，而O君與B君的位置會交托俾手足。 但係討論P君和K君的薪酬時，4人就此發生極大爭執，導致B君憤而離開，並將一切寫成一封光時內部公開信。我今日決定就將內容精選出黎，俾大家睇一睇光時內部到底有幾黑暗。 P君係一開始討論人工時，就已經要求10萬月薪 (佢事後亦有承認)。之後其他3人曾經要求將價錢調整為7萬基本人工+2萬為達標獎金。奈何按B君所講：一. 所謂達標其實極易，要求提高難度；二. 要求睇一睇P君 CV以作衡量基準。呢兩個要求都喺其他3人反對下不獲通過，而B君在爭取不果就決定公開。不過，到今日都係無人知道究竟P君實際既package係點，亦都無人睇過佢份CV。 如果光時係一間普通公司，自然無可爭議。但P君同K君都唔係光時既金主，光時係由各位義工協力，並加上由同路人買現金券既資金支撑起，P君又點可以自己決定自己應該出幾錢人工呢？ (事後被人發現， 原來P君上一份工作既人工係40-50K， 但在擔任光時義工期間已經被原公司炒魷。 P君根本就係以失業之身加入光時， 又何來挖角升職加薪至年薪百萬之資格？) 本來如果只係管理層人工高，我都唔打算公開。受薪唔代表食人血鏝頭，但係佢地厚待自己之餘卻刻薄手足，呢樣就一定要俾人知： 當B君仲喺度既時候， 光時個倉的Part time每日大約會請到4-5個人。到B君走之後，Part time愈黎愈少更，有Part time返工返到5:30，P君就趕住要人打卡，為左去慳個半小時人工。B君離開後就無人填補佢既位置，大部份既Part time喺無培訓、無更既情況下慢慢離開光時，慳到既錢就轉化為P君人工了。 另外，B君的公開信中仲提及：有一位喺獄中既魚革義士想申請釋前就業計劃，希望以光時名義先請左義士，等義士可以提早半年出獄。但係P君更加係對呢件事不聞不問， 完全無視義士，最後可惜申請唔成功。 P君同K君都無喺時代革命中被捕，以佢地既條件相信可以搵到工作。但佢地點解可以霸佔黃圈資源，出高薪俾自己呢？如果光時做到成績，相信同路人都唔介意2人收咁高人工，但自肥而刻薄手足既行為令人不恥。 最近仲出埋Donation Option俾人落單時收貼士，試問咁樣係唔係搶緊需要真正損款援助既機構水源？612，星火，好鄰舍北區教會，仲有眾多民意訴訟眾籌，光時點可以仲同佢地搶資源？ 光時既初衷係乜野？希望唔使靠捐款，用平時大家購買生活所需時的開支去養活手足； 同埋光時為佢地提供培訓，等佢地出獄之後可以喺光時做跳板。咁宜家又做唔做到！？ 希望光時既管理層見到呢篇文章會自己交代番事件，不過既然你地連自己內部都無交代過，相信你地都唔會有咩交代。 同路人們，如果手頭上仍然有光時券，不妨用盡佢。在光時未有實際回應前，如果真係想買日用品/零食，可以考慮：瓹窿瓹罅 GuruGuruhk.com 、 Jimmy Jungle 、 無名士 momingsi.com。3間都係黃店， 兼且會做實事。 光時由成立既初期到宜家都係有好多甩騼，但一直有賴各同路人互相支持、鞭策，以最大既包容俾光時繼續進步同改善。愛之深、責之切，我唔希望大家既同情與包容被利用，亦唔想黃色經濟圈失敗。我只係希望光時能夠拾回初衷，真係做到保護手足、養活手足。 Q&A: Ｑ：你係邊個? Ａ：光時入面小薯仔一個，只不過係睇唔過眼。 Ｑ：有無員工證？ Ａ：為左保護手足，光時唔會有員工證證明身份。但我講既野係B君公開信有提及，孰真孰假光時手足一定知。 Ｑ：點解要係連登開POST？想派花生？ Ａ：光時本來就係連登開始，而且B君內部公開信都無得到正面回應，唯有公開俾大家睇清楚。 Ｑ：係唔係鬥黃搞分化？ Ａ：唔係，只係想光時重回初心，要賺錢之所以仲要支援運動同培訓手足。 Ｑ：黃圈係唔係唔俾賺錢？ Ａ：首先公司賺錢同個人薪金係完全兩回事。出天價俾管理層正正就係會令光時無盈利去支援手足。 Ｑ：黃圈係唔係要做義工？ Ａ：唔係，受薪無問題，但要係合理水平。係咁既經濟環境下加薪100%跳槽完全係過份。 Ｑ：光時生意唔好，點請人？ Ａ：首先生意唔好就係管理層責任，全世界疫情都係網店大賺，特別係光時會衰左既？如果真係生意唔好，又點可能負擔到年薪百萬去請一個人？道理講唔通。 Ｑ：點解而家先爆？ Ａ：其實Ｂ君出內部公開信時已經講左會爆，只不過我睇唔過眼佢咁耐都唔做野，我爆先。 Ｑ：光時一週年post有提及過培訓左2個手足升職喎，你9 up。 Ａ：其實到B君公開信中有提及過實習計劃，打算推薦各同事去唔同部門實習。事實上喺光時Facebook一週年中提及的兩個例子(倉同事轉到Sourcing與及倉同事轉到Accounting)，都係由B君提出及要求，但其他管理層卻喺佢走左之後拎黎做政績。更甚既係，B君走左之後， 已經無人再實行實習計劃。轉左做Accounting個位Part time同事已經因為無更已離開左。 Ｑ：你想光時點做？ Ａ：公開承諾 保持初衷 投入更多資源去招聘受社運影響手足，爭強在職培訓及檢討其他福利，開拓其他途徑支援在囚手足 from : lihkg.com/thread/2253278