《Joker小丑》4年內加碼兩集？傳華納以5000萬美金誠意邀請男主角回歸🙈 《Joker小丑》上年一上映就成為票房冠軍，男主角 Joaquin Phoenix 更加憑電影拎到金獅獎同奧斯卡嘅最佳男主角！電影咁受歡迎，一眾影迷當然好希望會有續集喇。依家又有新消息啦～ 據外媒最新報導，華納電影公司都無諗過《Joker小丑》會咁成功，所以佢哋就打算加碼，喺 4 年之內拍多兩集，完成《Joker小丑》三部曲。而呢排佢哋就不斷遊說原班人馬回歸，當中包括導演 Todd Phillips 同監製 Bradley Cooper。 更有消息指華納豪擲 5000 萬美元請靈魂人物 Joaquin Phoenix 出山再演「小丑」一角，真係誠意十足！如果 Joaquin Phoenix 應承，將會係佢從影以嚟最高片酬嘅一次！ 而 Joaquin Phoenix 雖然本身當《Joker小丑》係一部獨立作品，但最近有傳佢對角色留戀，所以都心郁郁想同華納合作拍多兩部《Joker小丑》電影。事成嘅話，最快就可以喺 2022 年後睇到新一集啦～ 依家官方暫時都未有回應有關傳聞，希望好快就會聽到開拍續集嘅消息啦～ #joker #小丑 #華納 #DC