盧凱彤昨日離世21個月，摯友二汶出 post 分享佢地最後一次一齊出席頒獎禮嘅後台合照，指：「明天有一個將要舉辦的頒獎禮，不過誰都不會出席，疫情還未完結，而我居然很想跟你一起在這個頒獎禮的後台溜達。」 二汶表示好想同 Ellen 一齊行紅地毯，不過佢話「一切都不會這樣發生，也不再會發生。」今年金像獎，二汶同Ellen一齊獲提名，所以二汶喺結尾寫道：「恭喜我們，我最親愛的。」 而喺今日公布嘅結果，二汶同Ellen最終齊齊獲獎，分別係最佳原創電影音樂（金都）同最佳原創電影歌曲（Fly，盧凱彤負責作曲作詞）。盧凱彤嘅太太余靜萍亦獲得最佳攝影獎，好友岑寧兒亦都獲最佳原創電影歌曲獎（主唱）。而二汶今次獲得嘅最佳原創電影音樂，盧凱彤亦曾經喺2015年憑《紅VAN》奪得過。金像獎令佢地再次相聚同聯繫起嚟，呢個緣份相信佢地一定好感動。 二汶之後喺網上留言，感謝團隊同恭喜各好友：「我真的找不到任何一個字去形容這種感受，無論我們在哪裡，我們繼續寫下去吧，繼續用創作聯繫下去，不要分離，痛也別放棄。」 盧凱彤作曲嘅《Fly》係電影《少年的你》主題曲，原本由曾國祥向Ellen邀歌，Ellen亦答應為電影寫歌，不過期間不幸離世。為電影任攝影嘅太太余靜萍，為咗幫Ellen完成呢個合作，喺Ellen電腦搵到《Fly》嘅demo，後來將demo交比吳青峰填詞，仲保留Ellen demo 上嘅歌詞，由蔡德才編曲，保留Ellen demo嘅結他聲軌，交比岑寧兒主唱，大家合力完成呢首作品。 #金像獎 #林二決 #盧凱彤