開始干預香港新聞自由 #頭條新聞 #香港電台 #鏗鏘集 政協見梁家榮 促停頭條新聞鏗鏘集 幾名港區全國政協委員噚日同廣播處長梁家榮會面，投訴港台節目《頭條新聞》同《鏗鏘集》，要求取消兩個節目。政協委員、公營廣播關注組召集人彭長緯話，關注組去年10月成立後收到約1.8萬宗關於上述兩個節目嘅投訴。佢批評《頭條新聞》用低俗、諷刺手法抹黑政府部門，認同政府有不足要批評，但反問港台點解要製作嬉笑怒罵節目，影響香港市民道德觀念。 彭長緯話，梁家榮冇回應節目有何存在價值，又話覺得同事已經跟港台約章去做。 批鏗鏘集鼓吹「暴力背後有理念」 彭長緯同梁家榮會面後見傳媒，佢批評梁家榮嘅回應有既定睇法，認為對方作為處長並唔客觀。至於《鏗鏘集》，彭長緯話關注組蒐集到24集有關「黑衣人」，六成鼓吹暴力事件背後好有理念。佢又話，有一集訪問一個「警嫂」，話丈夫濫捕、亂打人，作為太太好困難、好辛苦；彭長緯反問「幾萬個警察，點解唔訪問一個好支持先生工作嘅太太？」