搵開鎖佬爆男友屋企　吳若希發癲狂打爛嘢 歌手吳若希（Jinny）曾多次公開力數老公Alex不是，早前更曾被師傅叮囑注意「夫妻宮」，鼠年可能會婚變！最近佢就喺有份主持嘅《姊妹淘》中，自認「癲」！ 佢自爆當時同男友（即老公Alex）分開過一段時間，跟住佢就上對方屋企時，發覺換咗密碼鎖：「即係擺到明要隔開我啦，以後諗住唔見我啦？」之後佢就搵開鎖佬上去爆門，而佢透露因為確實喺嗰度住過，保安又認得佢，所以自稱把鎖有問題，叫師傅爆鎖！不過癲處未算癲，入到去佢打爛晒啲嘢：「包括電視啦！魚缸啦！花樽啦！床啦…」嚇到身邊嘅蔡嘉欣、張寶兒及嘉賓黃嘉樂O晒嘴！ 當被問到點樣同Alex和好時，Jinny就笑言：「和好唔到㗎，所以我好憎佢㗎依家！哈哈哈～」佢又好享受「一個願打、一個願捱」嘅關係，覺得鬧交可以增進感情，而嘉樂就笑言：「我又Buy佢呢樣嘢，佢又唔係真係變態嘅，誇張咗啫！」又話鬧完交一定係自己Say Sorry先：「因為我好愛我另一半！」個個都大讚好Sweet呀！ #吳若希