[火炭大規模發展住宅 交通問題無對策] 火炭工業區嘅工業氣息濃厚，一直以來極少住宅。政府同發展商分別申請大規模改劃火炭嘅土地，轉為住宅。如果獲通過，火炭將有翻天覆地嘅變化。 🏫 山尾街 #社區綜合大樓 政府原先計劃選用火炭西熟食市場土地興建大樓。新選址改喺火炭東熟食市場同山尾街總站。設有社區會堂，醫療機構，並且會重置巴士總站。 新總站預計有九巴85同小巴481停泊，4條巴士線途經。然而駿洋邨嘅巴士今年已經改行火炭路 (唔入山尾街)，穗禾苑路線亦可能有類似改動。然而政府一直冇明確計劃巴士喺火炭嘅走線。 🏭 收回穗輝工廠大廈 改為公屋 穗輝位於山尾街近火炭村，巴士總站對面，改建為兩座公屋，人口3700。 🏢 㘭背灣街 大規模興建私樓 長實申請改劃火炭路以東一帶，鄰近火炭站，旭禾苑同星凱堤岸。範圍西至松頭下路，東至火車軌，興建24座大廈 (28-38層高)。 現有公共交通交匯處只有火炭站巴士總站，但係因為設計問題而得物無所用。而星凱堤岸售樓書提及地下有巴士總站，設有3個站坑，相信能夠服務火炭東部嘅新增人口。 🚌🚝 公共交通問題 火炭工業區嘅內街非常有問題，有大量單程路，需要不斷左轉右轉，而且容易擠塞。長遠而言需要重新規劃工業區道路先應付新增人口。 離開火炭工業區嘅道路只有火炭路，以單一道路服務全區暴增嘅人口，必定造成災難性影響，長遠需要新增道路連接火炭。 從駿洋邨嘅經驗而言，入伙後巴士總站即告爆滿。即使小巴481X為駿洋而開，都冇位放總站。火炭東嘅巴士總站夠唔夠，甚至火炭火車站應唔應該擴建，將會嚴重影響日後火炭居民嘅生活質素。 #火炭 #工業區 #駿洋邨 #旭禾苑 #彩禾苑 #星凱堤岸 #火炭路 #山尾街 #坳背灣街