UA院線網頁停止運作 有指員工星期一毋須上班 2021年3月8日週一 上午8:00·2 分鐘文章 一場疫情令各行各業元氣大傷，停業多月嘅戲院亦大受影響，今日傳出在香港經營逾30年嘅UA院線疑似結業！事緣有網民發現UA戲院嘅網頁及APP無哂放映場次，跟手直頭上唔到，連UA母公司立基集團嘅網頁都一樣。如果係技術故障，理應係公司嘅社交媒體有公佈，不過暫時冇update，似乎唔止技術問題！ 香港政府放寬防疫措施，戲院喺2月18日重開，UA仲大大力推會員優惠，社交網頁亦不停出電影post，絲毫未見結業嘅蛛絲馬跡。據電影界消息網頁「講鏟片」透露，UA戲院員工星期日收到人事部通知，星期一唔駛返公司，叫哂大家去灣仔聽講座。如果消息屬實，一眾員工應該幾傍徨。 疫情打擊之下，另一大院線百老匯旗下嘅The One及MCL康怡都有欠租，但係UA院線似乎更為嚴峻，屢次傳出有財務困難，上年8月分別被銅鑼灣時代廣場及九龍灣淘大商場嘅業主入稟追討欠租。UA院線由全港第2大院線越縮越細，早幾年接連無咗最搵錢、票房最高嘅朗豪坊戲院（現由Cinema City營運)，時代廣場戲院由地下位置被搬上13樓，而太古城中心就轉由百老匯旗下Movie Movie Cinema營運。無咗幾間人流勁旺嘅戲院，整體收益勢必有影響。 原本尖沙咀iSquare IMAX戲院完約後轉戰同區K11 MUSEA高貴靚場，據聞鉅額投資一心打造UA K11 Art House成為旗艦店，開業初期大力宣傳，可惜遇上疫情，結果開業不足一年就將戲院易手俾MCL院線。現時UA院線得返UA青衣城、UA MegaBox、UA Cine Moko、UA 淘大及UA 東薈城。 UA院線嘅母公司立基國際集團仲有經營餐廳、十字奶及Cityline購票通等業務，到底只有院線受影響，定係有更大變動，唯有等官方公佈。 #UA #UA戲院 #UACinemas #UA結業