緬甸政變局勢緊張，昂山素姬被扣柙，軍政府暴力鎮壓示威者，但依然有唔少市民繼續上街抗議。當中有兩位好有名氣嘅緬甸藝人，包括2013年已獲得緬甸電影頒獎禮（Myanmar Academy Award）影后寶座嘅Wutt Hmone Shwe Yi，以及貴族出身嘅人氣男Rapper Sai Sai Kham Leng，都有喺仰光上街參與「公民抗命運動」（civil disobedience movement, CDM）。 呢兩位藝人喺去年12月一齊打入福布斯「亞洲社交媒體具有影響力明星」（Forbes Asia’s inaugural 100 Digital Stars）百大明星之列，呢個排行榜並無名次，入圍嘅100位藝人或者組合係需要喺個人社交平台擁有過百萬followers，同埋利用到個人影響力喺疫情期間做一啲有意義嘅工作兼受到認可先會被選中，緬甸影后Wutt Hmone Shwe Yi嘅ig有130萬fans、fb 681萬，緬甸 rapper Sai Sai Kham Leng嘅ig fans 123萬、fb就勁到有成1,100萬，而其他入圍嘅各國代表有韓國天團BLACKPINK及BTS、荷里活嘅Hugh Jackman同Ruby Rose、日本嘅渡邊直美、山崎賢人、台灣有五月天同周杰倫等等。 呢次兩位緬甸藝人就正好運用自己嘅社交平台發聲，影后Wutt Hmone Shwe Yi仲不斷轉發相關新聞，又參與埋社運。其實喺去年6月，佢同朋友曾經一齊為仰光超過400名嘅醫護人員買健康保險，醫護人員如果喺工作中時不幸出現毛病，可以得到100萬緬幣（約5,500港元），呢件事亦獲得網民大舉稱讚。 #國際新聞 #國際娛樂新聞 #電影 #緬甸電影頒獎禮 #MyanmarAcademyAward #WuttHmoneShweYi #緬甸 #緬甸示威