中學生選十大新聞 澳洲山火居首 疫情國安法列二三 學友社2020年「全港中學生十大新聞選舉」結果噚日出爐，排首位嘅唔係本地疫情或事件，反而係外國新聞。澳洲山火以59.3%得票率成為去年十大新聞榜首，而持續約一年嘅新冠肺炎就以0.2個百分點之差排名第二。 學友社料因網上睇新聞見山火畫面 2020年選舉喺上年11月24日至12月17日舉行，投票中學生人數近3.4萬，學友社話為響應環保及減少學校統計票數行政工作，總選除紙本投票，亦會加設網上投票方式。澳洲山火連燒多月嘅新聞得票近2萬，學友社認為，中學生喺社交媒體閱讀新聞嘅習慣，令同學更有機會從畫面感受到山火對澳洲生態帶來嘅嚴重影響，而2019年嘅選舉結果當中，亦見同學對環保議題有一定關心。 中學生十大新聞選舉依次係：澳洲山火連燒多月、新冠肺炎全球大流行、《港區國安法》正式生效、新冠肺炎爆發初期醫護罷工、DSE延期考、小學教師涉散播港獨遭DQ、美國球星高比拜仁墜機亡、美媒宣告拜登勝出、特朗普確診新冠肺炎，以及美國非裔男遭警壓頸亡引發Black Lives Matter運動。 #澳洲山火 #武漢肺炎 #COVID19 #疫情 #國安法 #DSE #醫護罷工 #高比拜仁 #KobeBryant #美國大選 #特朗普 #BlackLivesMatter #BLM