《暖男爸爸》突襲！ 喺鄭中基（Ronald）嘅「機動電視台RTV」YouTube channel推出聖誕篇《假使聖誕原來不像你預期》，除咗冇張可頤同邵仲衡之外，《暖男》近乎全員出動，就連大咗肚嘅余香凝都有參與，同埋有特別嘉賓方皓玟出現，一齊為港人送上聖誕禮物。 條片係講章尾而發惡夢，所有夢都係同近期嘅社會狀況及港人話題有關，後來章尾而去咗鄭中基嘅便利店，發現執咗笠，喺街頭出現嘅強尼同佢講：「舖唔係要嚟租，係要嚟買，當你租咗99年，俾你搞旺咗佢，業主一聲唔該，話收就收，留舖不留人，你所有努力，佢一聲唔該就舐晒你，你話幾笨呢？」之後章尾而仲有其他奇遇，甚至奇到聖誕快樂都冇埋.... 唔劇透太多，但其中有一幕Ronald同全部人開聖誕party時，就講「好多人話聖誕有奇蹟，奇蹟咪你哋囉，只要你哋唔放棄，每一日都可以創造奇蹟。」去到片尾就出字幕「邊度有人，邊度就有奇蹟（Where there are people, there are miracles）」、「香港人，Merry Christmas。（Merry Christmas, Hkers!）」短短22分鐘嘅聖誕片內容豐富，亦繼續保持《暖男》風格，對白好又貼地，充滿擁抱希望嘅訊息，睇完仲令人會心微笑。Ronald呢份聖誕禮物，好窩心！ 大家去接收Ronald嘅心意啦，《暖男》聖誕篇傳送門： youtu.be/J12PE-2OKdw #假使聖誕原來不像你預期 #機動電視台RTV #暖男爸爸