眨下眼《全民造星III》十強爭奪戰已經去到第四日，仲爭一晚就齊晒十強名單。噚晚嗰集由CY表演唱出蕭敬騰嘅作品《王妃》，對撼Timo唱跳《All The Good Girls Go To Hell》。CY之前唔算太起眼，但今次佢喺台上又幾有台型，唱得都ok，不過依然有佢一貫浮浮地嘅特色，評判火火形容CY有啲彷彿，聽聲覺得好有力同好震動，但望到CY個人時就見佢唔太集中精神，林曉峰就話CY唔夠壞、奀皮，反而Joyce鄭欣宜同其他評判有唔同見解：「佢有啲特質，就係awkward（笨拙），但係一種likeable嘅awkward，有一種傻氣，你個樣有少少放空，但你又喺度又唔喺度咁樣，我好鍾意囉！」 主持強尼話CY係神經刀，「唔知幾時有幾時冇」，而CY由半年前參加《造星III》後直到呢刻，佢的確改變咗好多，佢喺台上講嘅係，「好嚴肅多謝彭秀慧老師，佢喺復活區救返我返嚟，佢又唔介意慢慢挖我入面多啲嘅嘢去俾其他人睇，so far咁多個項目嚟講，我冇諗過自己會做成點，我係諗緊我做呢個item，會唔會令到Kearen（彭秀慧）滿意...」講到呢度，CY已經耳仔紅晒，有少少哽咽，彭秀慧直情眼淚直流，喊到身都震埋，成個樣were晒，之後CY再講：「因為我唔想見到佢失望，所以我想最後呢個item...我都預咗會離開，我都想俾佢見到...我想佢放心呀，我唔想佢再因為我擔心。」彭秀慧老師雖然喊唒，但呢啲都係感動同喜悅嘅眼淚。 結果CY以四比一勝出，Timo落敗。而另一場對決係子涓自彈自唱《天黑黑》，對KLAU唱跳+Rap嘅《It's my different game》，最後由KLAU勝出。 cr. 囧報 bit.ly/33lWxDh #viutv #全民造星 #全民造星3