本土電影《夜香．鴛鴦．深水埗》因為屬非主流片嘅關係，戲院只係排得少得可憐嘅場次，雖然勢弱，但部戲本身唔差，充滿住溫柔嘅港味情懷，大部份影評都係讚，作為男主角之一嘅王宗堯無論係身體力行抑或social media都盡做，部戲嘅命運最終係點未知，但有網友就喺連登開po，話《夜香》開畫榮登入座率冠軍！ 呢篇文章搵咗好多資料同數據，論票房數字《夜香》係低，因為上映戲院少，但以票房去計番，入座率的確係高嘅，正因如此，今日《夜香》將會加場，雖然加咗都仍然係場次少，但都叫做行咗一小步，網民仲留言話「《夜香》破咗一項黃色創舉：成為在香港商業戲院作正式上映的電影中，首部包含香港反送中示威片段嘅電影。」 《夜香》喺呢兩日好似坐過山車咁上上落落，但得到網民咁關注同力推，宗堯好感動，亦都好多謝觀眾同各影評嘅支持。 #夜香鴛鴦深水埗 #電影 #本土電影 #港產片