團頭村即係康樂園嗰邊，廣福邨都中招，三個人都係住喺大埔。 #團頭村#梅窩 #Staycation #大埔 #武漢肺炎 #COVID19 梅窩懷疑爆發Staycation群組！涉及3條傳播鏈、數十位接觸者 衞生防護中心日前表示，本港懷疑爆發Staycation群組感染，初步確診患者係一位26歲女子，佢喺黃竹坑香葉道一間小型公司擔任文職工作，住喺大埔圍頭村，上個月25日至27日同7位朋友到梅窩銀礦灣海景渡假樂園Staycation，期間一行人喺酒店內燒烤，亦有去過梅窩一間茶餐廳食晏。 一行人離開梅窩後，女患者喺10月27日曾同15歲男親戚聚會，對方同樣住喺圍頭村，就讀粉嶺基督教香港信義會心誠中學，10月31日同屋企人拜山後出現流鼻水症狀，到急症室求醫後亦都初步確診。 衞生防護中心指，男患者喺10月30日曾經返過學校，而潛伏期內亦都喺粉嶺聯和墟同10幾位同學打籃球，當局要求學校停課14日，並向全校學生派發派樽留深喉唾液樣本。 另外，有線電視一位26歲男工程人員亦都初步確診，佢有去過梅窩Staycation，住喺大埔廣福邨，10月30日出現喉嚨痕症。衞生防護中心指，男患者喺10月24日起開始休假，但佢喺10月31日曾經同7位工程部同事同埋1位兼職記者喺粉嶺下輋路友人住所內打邊爐，所以有關人士被列為密切接觸者，需送往隔離營進行病毒檢測。 衞生防護中心傳染病處主任張竹君形容，今次個案群組已屬「爆發」，唔排除之後有更多確診個案，佢建議市民喺酒店活動時，應該盡量同本來同行嘅緊密接觸者一齊，避免同陌生人接觸。