Netflix劇集《Emily in Paris》甫推出就極速登上各地嘅熱播排行榜首位，而劇中演員嘅私人生活亦成為大家關心嘅焦點，特別係靚仔大廚 Gabriel（Lucas Bravo 飾）嘅感情狀況。近日就有網民懷疑 Lucas 同同劇演員撻著，而嗰位仲要係 Emily（Lily Collins 飾）嘅閨蜜？ 雖然 Lucas 早前接受外媒訪問時提到佢會喺工作上保持專業，所以都盡量唔會同同劇演員拍拖，但一眾眼利網民喺 IG 發現原來 Lucas 喺劇集殺青後去咗紐約搵有歌唱夢嘅保姆 Mindy（Ashley Park 飾）！ Ashley 一盡地主之誼，佢哋除咗一齊去睇《Mean Girls》、《Harry Potter》同《Hamilton》嘅音樂劇外，仲去咗食好西添！ Lucas 提到佢同 Ashley 相識經過好搞笑，事源 Ashley 喺開戲第二日誤以為佢係睇住道具嘅工作人員，再加上佢哋就住喺隔離，所以好快就熟咗～ Lucas 同 Ashley 喺劇中並無太多一齊嘅場口，但都可以咁熟，唔怪得會有撻著之嫌～ 雖然 Lucas 後來都有澄清返佢同 Ashley 只係好朋友同 2 個月嘅 roommate，依家仲係單身緊，不過網民就唔多信，覺得佢哋低調蜜運中。 不過其實 Ashley 真人都好有料，除咗係百老匯音樂劇嘅女主角之外，仲試過喺麥迪遜花園廣場領唱國歌，令到全場歡呼聲不斷！仲要身材勁好，絕對襯得起法國型男 Lucas 呀～ #emilyinparis #netflix #Gabriel #LucasBravo