由吳海昕、劉俊謙同徐天佑主演嘅 ViuTV 劇集《二月廿九》自今年 3 月播出以嚟大受歡迎，網民大讚劇本創新兼製作嚴謹，所以都好希望有續集出現！而官方日前就宣布將會喺明年 4 月開拍續集《940920》，除咗有原班人馬坐鎮之外，仲會有新卡士加入添～ 《二月廿九》講述 Yeesa（吳海昕飾）喺 2017 年生日前夕接觸咗媽媽嘅神社御守而穿越到 3 年後嘅北海道，仲結識咗 Ryan（徐天佑飾）同余家聰（劉俊謙飾）。由於 Yeesa 喺新聞得知自己未來會發生車禍，有人仲因而身故，所以 Yeesa 每年都透過余家聰嘅幫忙去穿越，以改變本來嘅命運。 由於《二月廿九》有唔少穿越、平行時空嘅橋段，同大熱台劇《想見你》不謀而合，所以呢部劇又被譽為係港版嘅《想見你》。 而續集《940920》其實係余家聰媽媽嘅死忌，亦係佢畀 Yeesa 穿越後相認的密碼。所以續集將會主要以余家聰作為劇集主軸，而 Ryan 可能就會慢慢淡出，但唔排除到時徐天佑會喺續集客串。 . 除咗原班人馬之外，《幻愛》女主角兼劉俊謙女友蔡思韵亦會加盟續集，飾演同樣有穿越能力嘅人，而余家聰將會加入由蔡思韵所創辦嘅「神聖幾何學會」，相信佢哋到時會有唔少對手戲～ 而網民亦推測今次好大機會係大玩兩女爭一男嘅橋段！雖然今次有蔡思韵呢個正牌女友坐陣，但睇落大家都係支持 Yeesa 同會長（余家聰）一齊多啲～ 早前《二月廿九》喺今屆嘅亞洲學院創意獎（Asian Academy Creative Awards）榮獲今屆香港「最佳電視劇」（Best Drama Series），仲會喺 12 月同另外 10 個國家嘅劇集競爭「亞洲大獎」添！ 《940920》延續原本製作班底，由黃智揚編審，羅嘉駿執導，而羅嘉駿預計續集嘅劇本創作會喺 12 月完成，明年 4 月喺港台兩地開拍。 #二月廿九 #港劇 #ViuTV #940920