無論隕石撞地球引發嘅係滅頂之災，抑或一如某國近期一篇醫學論文所講，係武漢肺炎嘅來源。可以肯定嘅係我哋現今看待災難片，視聽奇觀都已經唔係主要看點，而係末日降臨之下，儼如熱鍋上的螞蟻嘅人類，每個重要關頭所做出嘅抉擇。《末世綠洲》成功地喺奇觀展現與人性命題之間，取得一個巧妙平衡。前半部家人逃難時失散，話分三頭，三條故事線誘出嘅子題都各有特色；後半部天劫一浪接一浪，迫真到有如親歷其境。 面對地球終結，有人會選擇掠盡資源、有人會欣然接受命運安排、有人會救得一個得一個。回到現實，人人都有可能係片中其中一個小角色，而睇一部災難片，亦都可以學習避免自己變成戲中嘅小角色。但我哋似乎都難以避免面對片中「被選中嘅人」相似命運：要有健康碼先可以出街。 #末世綠洲